काठमाडौं ।  क्रिकेटर सन्दीप लामिछानेविरुद्ध लागेको नाबालिग बलात्कारसम्बन्धी मुद्दामा तीन दिनदेखि सुनुवाइ जारी रहेको  छ। मंगलबारदेखि भइरहेको बहस लम्बिएपछि बिहीबार पनि आदेश आउने सम्भावना पनि  कम हुँदै गएको  छ।

वकिलहरुले बहस लम्ब्याएपछि उक्त मुद्दामा आजै आदेश आउने सम्भावना कम रहेको  स्रोतको भनाइ छ । बहस आज दिनभर जान सक्ने भएकाले आदेश आउन अझै केही दिन कुर्नुपर्ने हुन सक्ने स्रोतले बतायो । 
बुधबार अधिवक्ताहरु रोशन पौडेल र मुरारी सापकोटाले बहस गरेका थिए भने बिहीबार पनि सन्दीपकै पक्षमा वकिलहरुले बहस गरिरहेका छन् ।  सापकोटाले बुधबार पीडित भनिएकी किशोरी बालिग रहेको प्रमाण न्यायाधीशसमक्ष पेश गरेका थिए।  उनले बहसका क्रममा पीडित भनिएकी किशोरी १८ वर्ष पूरा भइसकेको तीन प्रमाण पेश गरेका थिए।

जसमा पीडित २०६१ असार १८ गते जन्मिएर गत भदौमा घटना हुँदाको समय १८ वर्ष ३ महिना पूरा भइसकेको जन्मदर्ताको प्रतिलिपि, कक्षा ८ मा भर्ना हुँदा कायम भएको उमेरको कागजात र बसाइँसराइ गरेर जाँदा उमेरसहितको विवरण समेटिएको सरकारी कागज पेश गरिएको छ।

उक्त प्रमाण पेश भइसकेपछि वरिष्ठ अधिवक्ता कृष्ण सापकोटा,  अधिवक्ता सविता भण्डारी बराल र अधिवक्ता सुवास पाठकले बहस गरिसकेका छन्। 

बिहीबार वरिष्ठ अधिवक्ता लव मैनालीले सन्दीपको पक्षमा बहस गरिरहेका छन्। सन्दीपको पक्षमा वकालत गरिरहेका कानुन व्यवसायीहरुले पीडित भनिएकी किशोरी नाबालिग नरहेको प्रमाण पेश भइसकेको तर्क गरेका छन्। 

उनीले अभियोग नाबालिग भनेर लगाइएको अवस्थामा उनी बालिग भएको पुष्टि भइसकेकाले सन्दीपलाई थुनामुक्त गर्नुको विकल्प नरहेको बताएका छन्।